Get ekki orða bundist

Ég var að horfa á Draumalandið í sjónvarpinu - vel gert hjá RÚV að sýna þessa mynd svona á sunnudagskvöldi. Það er eiginlega ekki hægt annað en að hrífast og þegar öll Alcoa atburðarásin eru skoðuð svona í baksýnisspeglinum þá er þetta algjörlega súrrealískt.

Ég veit að við gátum ekki vitað það þá, en hverju erum við bættari í dag með álverið fyrir austan og þessa risastóru virkjun? Kannski hefði íslenska bólan okkar aldrei sprungið með þessum svakalega hvelli og hugsanlega væri icesave ennþá bara markaðsátak hjá Landsbankanum.

Ég veit, ég veit; það er bannað að tala svona en það er ekki annað hægt. Þarna fóru stjórnmálamenn fram, þá sérstaklega Valgerður Sverrisdóttir, eins og það væri ekkert annað í stöðunni en álver. Hvernig ætli henni líði í dag að hafa skilið þetta eftir sig? Það væri sannarlega gaman að vita það en ekki vildi ég vera hún.

Kannski getum við með einhverjum hætti bætt fyrir þetta með því að koma Alcoa úr landi, hækka til þeirra raforkuverðið svo um munar og hrekja þá á brott. Líklega ekki hægt en má reyna.

Athugasemdir

[Ragnar Gunnlaugsson, 7.3.2010 kl. 21:43]

Heldur mikil áróðursmynd fyrir minn smekk.

[Davíð Gunnarsson, 8.3.2010 kl. 14:42]

Já þetta er í eðli sínu áróðursmynd og hún lyktar verulega af því. Hins vegar kemur margt áhugavert fram í henni og kannski finnst mér fyrst og fremst málið vera að hún vekur mann til umhugsunar.